謝安琪種直徑超過25cm番薯被大讚：第3次出產

歌手謝安琪（Kay）早前宣布約滿麥浚龍旗下的幻國文化娛樂後，趁未開始新一章節前，佢把握小休時間享家庭樂，社交平台都晒多咗同一對仔女嘅可愛互動，除此之外，佢仲「轉行」做埋農夫，為佢塊小福地起名「小琪圃」，喺佢悉心栽種之下有唔錯嘅收穫！包括有1隻水瓜仔、2公斤番薯同埋1棵菜，Kay仲好開心話：「其中番薯部門可以話係小豐收呀！菜仔部要加油了！」

呢個Post一出就引嚟好多農系網友，各自分享自己的成果，唔少網民都話啲番薯好正，Kay勁滿足咁話：「真係好食㗎！今次已經係第3次出產，上次收成有一個直徑超過25cm，形狀圓轆轆令人好驚喜！」另外有網民話好羨慕Kay呢種悠然自得嘅生活，Kay就話原來一家人都好鍾意裁種，媽媽甚至之前有租用有機菜田，因為疫情少出門，再次嘗試喺屋企栽種。