雲浩影自資6位數出歌　呻玩音樂唔簡單

ViuTV選秀節目《全民造星III》參賽者雲浩影（Cloud）受邀擔任譚仔雲南米線產品代言人，她、朱鑑然和「譚仔姐姐」紅梅姐齊齊出席「雲遊芫茜世界」發布會。她更獲贈終身免費食米線，又自爆識扮譚仔姐姐。

講到工作動向，Cloud透露快將推出新歌，預計暑假前面世，以獨立音樂人身份自資6位數字：「將廣告啲收入拎晒去投資歌唱事業，要工作先要造到歌。」提及《造星III》同屆學員如ANSONBEAN、Alina、「折骨Ben」趙祥誠、陳葦璇等都有很好發展，甚至已簽公司，問到會否眼紅？她直言沒有，因為各人發展不一：「有公司同冇公司都係咁做，冇公司就好多嘢都要落手做，自己都希望學多少少嘢，如果將來有公司都知點做。（傾價錢尷尬？）有經理人公司幫手嘅，踏入呢行先知造歌唔簡單，背後有好多一環扣一環嘅嘢我都未接觸過，同拍Cover係兩回事。」