張智霖張繼聰「肉」帛相見　浸浴浸到暈

藝人張智霖（Chilam）、張繼聰於抗疫電影《總是有愛在隔離》中，有不少搞笑演出，當中包括兩人「肉」帛相見搽蘆薈油，Chilam直言：「幫人按摩都唔容易，特別阿聰啲肌肉咁厚⋯⋯真係每個行業都有艱難嘅地方。」而張繼聰就話：「好在同Chilam熟，所以犧牲色相都唔尷尬，如果同其他冇咁熟嘅人，可能會就住就住。」

提到犧牲色相，兩人不約而同指「難度指數」也不及浸熱水浸足半日，張繼聰表示：「以為有桑拿戲好爽，點知浸完冇得按摩，同埋我覺得我哋好似打邊爐個爐入面嘅雜菜，出晒煙！」Chilam表示同意之外也補充：「我哋浸到暈暈地，其實一班負責拍攝嘅劇組人員同我哋一齊浸，佢哋仲辛苦。」張繼聰笑言雖然辛苦，不過拍得非常開心：「因為可以試到好多唔同嘅嘢，飛車、打鬥、唱歌、捽油等等，平時好少一套戲會試到咁多嘢！」