坐緊21日疫監 吳業坤返港聽到粗口好親切

2021年04月08日 09:09
東網電視
更多新聞短片
歌手吳業坤早前終於結束為期5個月嘅Working Holiday由日本返港,依家就坐緊「疫監」隔離21日,日前就着住睡衣、打大心口露肉咁開Live自彈自唱畀Fans聽,佢受訪笑話件睡衣係唯一一件見得人嘅衫︰「因為真係冇乜衫,之前都冷落咗班Fans,趁依家有多啲時間、空間唱Live畀佢哋,如果之後要拍劇、錄歌就冇時間做Live。」
雖然離開咗香港一段時間,但佢話一返到嚟冇嘢唔慣,一落機就聽到好熟悉嘅廣東話,二來就係見番香港人嘅嗰種「躁」,佢笑話︰「等檢測嘅時候,前面有人打電話好大聲同屋企人講要等好耐,喺日本係絕對冇呢啲咁嘅情況出現,大家唔會喺公眾場所講電話,而上到小巴又聽到好多抱怨,仲聽到粗口,呢個都係香港嘅特色之一,聽番即刻好有感覺。」
講到要坐21日「疫監」,佢話已經一早諗定做啲咩,所以一啲都唔會悶,首先要做嘅就係減肥︰「會做斷食、剪片、做訪問、做運動,因為喺日本食咗好多嘢有變肥,要減肥!(肥咗幾多?)體重冇乜變嘅,只係肌肉少咗、脂肪多咗,同埋要整理番日本啲嘢,睇吓第時可唔可以拎嚟造歌,行『東海道53次』有寫到歌,好想快啲出嚟錄音、派歌。」至於佢話隔離完最想做嘅事,就係即刻返屋企見屋企人同2隻愛貓,其次就係去Gym Room做Gym,之後再想快啲返公司Sell橋,因為佢話佢個「小宇宙」諗到好多好橋!