鍾嘉欣自爆揸車蝦碌史!煞車變踩油撞爛人哋架車

2021年04月08日 11:03
東網電視
更多新聞短片
靚媽鍾嘉欣自嫁畀老公Jeremy後,就生咗一對仔女,之前佢戲癮發作,就返香港拍無綫新劇《星空下的仁醫》,之後就返咗加拿大繼續享天倫。不過嘉欣都冇因此唔記得Fans,經常喺個人短片頻道出片講自己近況。
最新一條影片中,佢就獨自揸車去睇櫻花,又分享自己揸車嘅趣事。佢話自己17歲已經考到車牌:「其實考試前2日,爸爸教我泊車嘅時候,我扭軚準備倒車,點知我冇撳到『倒車』,之後一踩油就撞埋前面架車度,但我因為驚,爸爸叫我『煞車』,但我就不斷踩油以為係煞車,前面架車個車尾,被我撞到凹晒,呢件事對我揸車真係好有陰影,喺香港時都冇揸車出入。」
喺香港生活時雖然冇揸車代步,但拍劇集《溏心風暴》時就差啲搞出意外:「嗰場戲係拍我揸車、停低、落車、跑,我當時以為自己做得到,但點知我落車時,我唔記得撳『泊車』,架車繼續走,差啲就撞到攝影師,我幾驚呀,好彩現場所有工作人員都立即跑過去熄咗架車,即刻開車門踩番個Brake!」
嘉欣話返到加拿大生活後,作為人母就一定要識揸車,所以決心重考一次車牌,對駕駛信心提升唔少呢!