謝安琪決定考電單車挑戰張繼聰!到底佢學棍波定自動波?

2021年04月08日 18:02
東網電視
更多新聞短片
張繼聰揸電單車揸到入血,前兩日架車死火,搞到要向老婆謝安琪(Kay)求救,仲話架車死火,好應該買多兩部旁身!Kay唔知係咪想知道老公點解咁鍾意電單車呢件死物,佢原來已報名學電單車,仲喺社交網公告天下。
雖然只係報名,不過Kay都有坐上架電單車感受吓,見佢凌厲嘅眼神,就知佢今次不成功便成仁。咁到底佢學嘅係棍波定自動波,佢有詳細解釋......
「稍為說明一下,呢張相拍攝當日,我只係去報名,所以服裝方面嚟講,可以話係錯晒,我冇諗過原來報名當日,可以得到機會,坐上電單車感受一下,雖然服裝方面,可以話係嚴重出錯,但係無損我凌厲嘅眼神,我究竟諗緊乜嘢?我係諗緊......屋企全部都係棍波車,我一定要考到棍波車牌,如果唔係,有人(指張繼聰)又有藉口……再買新車,為咗呢個原因,一定要考棍波,事情就係咁樣決定!」
Kay接受東網訪問,講到學電單車,佢話:「其實我就係唔係好識電單車啲嘢,諗住學識咗揸電單車,就應該會比較明白同埋體會到點解張先生每次出車都咁開心,點解同啲朋友傾電單車嘢都咁開心,可以分享吓快樂呀嘛!」