同老公坐疫監21日　陳鈺芸日日收驚喜

藝人司徒鈺芸（JuJu）（前稱陳鈺芸）早前與導演老公司徒永華在泰國拍戲三個月，近日終於返港，展開21日的酒店隔離生活，她說：「好在公司好好，安排我哋入住六星級酒店嘅套房，有900呎，成間酒店只有11間套房，好在我哋訂到。好彩我同老公一齊隔離，好過一個人，冇咁悶。我哋定咗一個時間表，每朝9點酒店會送早餐過嚟，我哋食完早餐就做運動，跟住食晏，我有啲朋友送咗啲遊戲機同砌圖畀我哋打發時間。酒店包埋一日三餐，都係酒店入面嘅餐廳，全部食物都好高質素，每餐都唔同，有時仲有啲下午茶、小食，好有驚喜。」

她透露現時正執筆撰寫一個她將會執導的短片劇本，希望在隔離期間完成，出關後便可籌備拍攝。另外，JuJu稱原本出關後要飛往澳洲拍電影，但她最後也推掉了：「因為隔離太多，我依家隔離完3星期，只可以返屋企2日就要飛去澳洲，再隔離2星期，拍2星期戲，再飛回香港隔離3星期，即係喺2個半月之內要隔離2個月，太誇張，所以就推咗呢套戲喇！」