效法韓國網紅減肥法　孫慧雪先食肥自己

藝人孫慧雪到電台受訪，講到她在社交平台分享減肥失敗，她笑言：「我減完之後發覺有皺紋，因為生完之後啲組織鬆咗，又減得太快，所以我依家效法啲韓國網紅增咗肥先，畀自己食肥咗，再用其他方法減肥，因為之前一次過cut澱粉搞到個人好乾、好攰，啱啱之前見完個朋友，佢話唔應該咁減，應該要正常食飯同埋做運動，所以我就開始做運動，尋日就跑咗1個鐘步，即刻瘦咗1磅。」

她又大讚朋友身形很fit：「佢條腰得22吋，佢都係生完，但條腰可以22吋，我希望去返生之前24吋就得啦，依家差唔多26吋，爭少少都好難去到。」

另外，提到患第4期肺癌的藝人好友陳積榮，她透露一路有探對方：「佢依家喺屋企休養緊，我有上去佢屋企執屋，佢啱啱做完第2次化療個人會攰啲，所以唔敢打擾佢太多，過2日就攞埋啲物資畀佢補身，佢依家好瘦，但意志力好強，佢話畀多2日時間佢精神可以返番嚟，都見佢精神1日比1日好。」