張致恒一身街數滿臉白鬚!為大仔慶生終於現真身

2021年04月10日 10:18
東網電視
更多新聞短片
張致恒(Steven)因借錢爭落一身街數,早前更被馮鎵瀠(Naomi)公開追債,之後就失去聯絡,又指佢着草走數,搞到佢好耐都冇蒲頭,最多都只係更新社交網,都未公開現身過。
今日凌晨,Steven被追數後首次放近照上社交網,為嘅係祝佢大仔天寶2歲生日快樂。只見相中嘅佢抱住囝囝,雖然一臉慈父咁笑晒,但36歲嘅佢滿臉白鬚,滄桑唔少,佢又刪去留言功能,只可以畀Like,以免被人無限上綱。
為咗個仔生日,佢又留言話會做好自己:「我個臭寶終於兩歲啦,突然間好感觸,生日我唔喺佢身邊,當我離開屋企之後老婆同我講佢就唔開心咗好耐又唔肯食飯,個心真係好痛,但係冇辦法,始終一個家庭要努力先至維繫到,一日一日咁大,佢一個字一個字咁講出嚟,嗰種感動係喺呢個世界搵唔到嘅,只有做父母先會感受得到,依家我嘅目標只係想盡快還晒啲錢,同埋畀一個健康又舒服嘅環境佢哋兩個成長,任何人攻擊我嘅說話,我都會當係對我最好嘅強心針!張天寶,爸爸永遠都會咁愛你 ,生日快樂呀!」