黎美言婚紗照紀念HotCha成軍14周年：想紅館開騷

藝人黎美言（Winkie）在社交網甫出一輯婚紗照，身穿透視嫁衣的她人比花嬌，疑即將出嫁，她接受訪問時否認結婚：「其實係想影輯靚相，紀念吓（前組合）HotCha成軍14周年啫，4月4日係我哋3個女仔出道嘅日子，我祝HotCha生日快樂，揀兒童節出道係因為覺得呢個節日好開心。」

她又稱回想當年以新人姿態投身娛樂圈，至今轉眼已14年，感覺時光飛逝：「當年我哋仲係柴娃娃，乜都唔知嘅女仔，好好彩有機會做偶像，亦都可以做自己鍾意嘅跳唱歌手，記得第1次公開表演係喺銅鑼灣某商場，諗起之前啲事，感慨又開心。」

談及其入行多年的心願？她坦言無論是個人或組合身份都想舉行人生第1次紅館演唱會，屆時可以集合所有歌迷，又話遇見自小學二級就支持她的粉絲，現對方已20幾歲，最開心是：「佢話我似18歲喎，我都算保養得好，希望成為美魔女啦。」