【嚇呆林子善大行動】黃祥興袁偉豪踩上門輪流送驚喜

藝人林子善4月13日生日，佢嘅一班手足提前為佢慶祝，仲驚喜浪接浪添！子善喺社交網上載同黃祥興夜景下攬腰HeHe合照話：「有陣時啲嘢真係好奇怪，尋晚喺房睇緊呢張相時，老婆同個妹返到嚟屋企，由房行出門口，奇怪嘅事就發生…」原來咁啱黃祥興準備咗個蛋糕送上門，壽星仔開門時嚇到呆！

幾分鐘之後，子善再去開門：「唔會有第2個人衝出嚟嘛？」點知係另一好兄弟袁偉豪，佢化身外賣仔捧住一大箱嘢食現身，隔咗2秒先認出對方嘅子善，開心到大笑：「你老婆（張寶兒）呢？你班友，估到你『籠』嘢啦！」子善都話好Surprise呀！