外公離世！林德信發文悼念：感恩陪着我成長！

歌手林德信（Alex）向來念親恩，父親林子祥同母親吳正元都感恩有個咁孝順嘅仔。不過Alex尋晚就喺社交網公布一個唔開心嘅消息，佢發文悼念剛離世嘅外公：「公公我好感恩你一路一直陪着我成長。細個嘅時候當我瞓唔到覺你會坐喺我床側邊patpat（按）我隻腳直至到我入睡。每日送我返放學煮好多嘢畀我食。到你變老嘅時候有病我就坐喺你張床側邊幫你做按摩，每個禮拜日就會同你食飯。我覺得自己好幸福。多謝你畀我呢個機會將所有你畀我嘅愛還番畀你。多謝你照顧得婆婆咁好。」Alex又上載多張同外公溫馨點滴嘅珍貴照片，如今天人永隔，唔少網民都叫佢堅強！