何廣沛男團夢未死：係睇觀眾接唔接受…

藝人何廣沛曾有機會成為男子組合「天堂鳥」的成員，不過最後都決定專注當演員，他坦言﹕「由細到大都有個夢想，就係做男團，因為感覺好奇妙，一班人一齊去拼搏同奮鬥，一齊去追夢。不過做男團要付出好多心血同時間，作為演員拍劇連休息時間都冇，好難可以兩方面發展，所以好早已經知道只可以二選一。」他又指佩服有些男團成員可以兼顧拍劇，他笑言﹕「佢哋應該冇乜人生，因為24小時都係工作。（如果有機會想唔想試﹖）我呢個年紀仲有機會咩﹖我唔介意，係睇觀眾接唔接受。」

另外，廣沛最近告別清靚白淨的外表，開始留鬍鬚，他稱為下套劇的造型作準備﹕「因為監製想要新鮮感，我就試吓留鬍子，仲未確定係咪呢個造型。觀眾睇咗咁多年我都係乾乾淨淨咁，我唔想局限自己，有機會嘅話都想試吓做奸角。」