內地掘金儲唔到錢?許靖韻唔使食穀種嗌好彩

20210413
東網電視
更多新聞短片
許靖韻成功打入內地市場。
歌手許靖韻(Angela)推出新EP《Step Forward》,當中《別為我好》成績很好,她以前多翻唱別人的歌,現在終有一首歌獲大家翻唱,令她大感安慰。過去大半年她留在內地工作,曾參加不同綜藝及音樂節目,如《蒙面唱將猜猜猜》及《嗨唱轉起來》,更曾與不少前輩合唱,包括張智霖、王祖藍、台灣歌手張韶涵等,令她倍感榮幸:「真係冇諗過可以同咁多前輩合作,好開心,呢段時間嘅經歷好豐富。」提到她與謝霆鋒、容祖兒、陳偉霆等師兄師姐一樣,成功打入內地市場,她自覺幸運,希望可以更努力,有更多工作機會。
問到返內地掘金可是收入大增?她說:「我差唔多係搵幾多使幾多,因為我喺北京有租地方住,雖然唔係好多錢,但相對地都使多咗,香港都有租Studio,所以2邊租地方負擔就會多咗,所以唔係話儲到好多錢,但唔使食穀種已經好好彩,又可以畀到少少錢屋企人。」
內地開工有思鄉病
她亦謂這是留在內地最長的一次,因疫情關係,中間未能返港,直到新年才能回來,坦言掛住家人:「大時大節我都會同佢哋視像,佢哋都好明白同支持我。(自己一個會孤獨?)一開始都有少少唔慣同孤獨,因為我係同屋企人住,屋企平時好嘈,但去到嗰邊自己一個人住就太寧靜,所以有少少唔慣,但過咗1、2個月有朋友,而且之前《創造101》大部分朋友都住喺北京,所以會成日約埋一齊出去玩,就好好多。」
同容穎賢只係好友
問到朋友可有乘機介紹內地男生給她?她說:「一齊玩一定會識到,可能大家都係同一個節目,傾嘅話題都好相似。」她又大讚內地男生OK,問到與香港男生有何不同?她說:「未試過同佢哋拍拖,但香港嘅男仔精明啲,內地男仔就豪爽啲,可能食飯習慣唔同,香港同朋友食飯係AA制,但內地係可能會請。」講到感情生活,問她之前與《全民造星》參賽者容穎賢傳緋聞?她即避談說:「係好朋友,依家專注做嘢為主。」又謂音樂以外,希望有機會拍電影及電視劇。
服裝:initial Fashion
場地:中環迷你酒店