吳若希心急返屋企湊BB　等多一個月再搏殺

藝人吳若希於電視城出席活動，全程幾乎口罩不離身，她直認自己相當小心：「話晒屋企有兩個命根（一對小朋友），同埋我又未考慮打針，都係小心啲好。」談到新工作，她繼續「慈母上身」謂：「屋企小朋友仲細，想畀多少少時間喺屋企，所以都係《姊妹淘》，同埋錄影《勁歌金曲》咁，做啲瑣碎嘅工作，有時都心急返屋企湊女。（幾時先開始拚搏，收復失地？）等BB半歲啦，即係等多1個月左右，之後要正常做嘢，趕進度喇！」