永遠擺老婆第1位!林峯講娘爆肉麻情話 網民打冷震

20210414
東網電視
更多新聞短片
近年非常活躍大陸演藝圈嘅林峯,最近攜妻參與真人騷《妻子的浪漫旅行5》,奉旨晒恩愛,點知仲未夠,佢自己上埋另一節目《甜蜜的任務》晒命!林峯一向少有公開談感情生活,但竟然肯拍真人騷,佢話:「這次其實我覺得是一個,讓我有一個機會更懂得體會我老婆(張馨月)真心的一個感受。」佢坦言結婚1年多,但好多時間都放喺工作上,喺老婆身邊嘅時間唔足夠,今次令佢更加意識到,要好好調整一下,希望多啲時間陪家人。
雖然做咗爸爸多咗個「前世情人」,但林峯依然擺老婆喺第1位:「回到家,我一定是先看我老婆的!」更對鏡頭用堅定眼神向老婆示愛:「媽媽永遠是第一!」之後佢回想第1次抱起囡囡嘅感覺:「我不知道怎麼去形容,很不真實,我現在連想起來我都會激動。」不過因為佢係家中長子,從小就訓練有素,笑言抱B係熟手技工!
當被問到同老婆鬧交或者冷戰時會做咩呢?林峯二話不說話會「道歉」,不論咩情況都係佢錯!之後佢示範講老土情話時,佢冇啦啦話:「老婆你為甚要這麼害我?」下一句竟然係:「害我那麼愛你!」另一句係:「老婆你能不能不要這樣?不然我見你一次愛你一次!」肉麻到連佢都忍唔住嗌夠喇!佢又大讚張馨月係個溫柔、體貼同賢淑嘅女人。而他亦不介意公開電話設定張馨月為「LP」,即是老婆意思。網民都話Sweet到打冷震呀!