【娛刺撈飯】千禧五虎搶閘 TVB新天王誕生!

2021年04月14日 14:30
東網電視
更多新聞短片
潮流興變革,唔改唔變死固固整定冇運行,但係向經典致敬,亦都係另類Gimmick,用呢招宣傳好使好用,仲無乜成本,點解唔循環再用喎!無綫近半年動作多多,最近傳會力捧「千禧五虎」,向昔日兩代「五虎將」致敬,改個名加個朵就有得見報,好划算吖!「千禧五虎」分別係余德丞、丁子朗、羅天宇、周嘉洛同朱敏瀚,斯文靚仔又有,粗獷型格又有,搞鬼搞笑又有,連綜藝司儀都有,呢個List幾似樣喎。
1983年,無綫創辦人邵逸夫親自點名,搵咗當時5大小生組成「五虎將」,當中包括影帝梁朝偉、三哥苗橋偉同埋黃日華等等,當時佢哋紅到發紫,唔少由電視圈紅到電影圈,仲拍咗套戲叫《五虎將之決裂》,絕對係7、80後嘅集體回憶,嚟到依家都仲有唔少人記得呢個朵。去到95年TVB食過翻尋味,搵古天樂、劉愷威、古巨基、吳家樂同何遠恆組成《新五虎》,雙古之後喺電影圈同樂壇做天王,劉愷威去到內地發展更加搵到盤滿砵滿添。
睇番「千禧五虎」陣容,羅天宇似乎係最吸睛。早排《香港愛情故事》爆紅,網民都話套劇夠真實,羅天宇做個為咗買樓,同女朋友日捱夜捱嘅癡心情長劍,角色討好入晒屋,靚仔之餘仲騷埋副靚Body,難怪多咗勁多Fans。佢之後仲會做新版《十月初五的月光》嘅司徒禮信,當年馬浚偉都係憑呢個角色升做一線小生,本身家底唔錯、個Look似足有錢仔嘅羅天宇,氣質啱晒做司徒禮信,羅天宇想做TVB做新一代天王,睇嚟形勢大好。
但係今年10月就34歲、入行已經13年嘅羅天宇,一直承認自信心唔夠,伯樂「珍姐」曾勵珍成日勸佢,講嘢要大聲啲、行路要大步啲,仲要勞煩媽咪督促佢畀心機。之前2年冇劇拍,仲傳佢態度懶懶閒添。一個人遇到機會,要變勤力唔難;但自信心唔係話有就有,同性格好有關係。每一個天王巨星,都對自己超有信心,唔會娿娿哿哿畏首畏尾,如果表現連自己都說服唔到,又點散發天王光芒先?羅天宇要更進一步,真係要諗諗點改善喇。
比起羅天宇,似乎「金城安」更加值得睇好喎!就算唔係TVB FANS,應該都知《愛‧回家》係無綫王牌劇集,做咗千幾集都咁多人睇,你估咁易呀?劇入面好多角色都彈起晒,「金城安」周嘉洛仲威到24歲就攞最佳男配角。佢人氣勁就梗架喇,最重要係公司幾睇得起佢吖嘛。最近王祖藍因為要專心高層事業辭演重頭新劇,有傳會搵周嘉洛頂替,呢一招無綫真係睇啱人,周嘉洛有觀眾緣,已經積咗幾年人氣,有資格更進一步,佢年輕有活力夠搞鬼勁有喜感,只要真係重用,畀機會佢喺正劇發揮,分分鐘大紅大紫。無人話佢會係下一個周星馳,但要做王祖藍2.0,有更好外形嘅周嘉洛要做到唔難。
講完心目中跑出大熱,佢都係值得𥄫實嘅。睇番依家TVB嘅小生,郭晉安、黎耀祥56歲,馬德鐘52歲,陳豪49歲,連蕭正楠同黃浩然都已經44同45歲。一向係網民最愛,最貼地嘅馬國明亦已經47歲,「千禧五虎」入面嘅朱敏瀚,係可以行馬明條路。朱敏瀚雖然個樣鬼鬼哋又有啲花弗,但查實佢同馬明一樣默默耕耘,入行12年由無綫御用細佬、瘦瘦削削周身冇肉,到近年轉型突破,《反黑路人甲》個陸秋滿身肌肉成排朱古力出晒嚟,抵佢攞「飛躍進步男藝員」。朱敏瀚好認真好努力可塑性又強,做富二代又得打仔又得,戲路同馬明都幾似,大家諗吓馬明「唔‧係啩」樹熊個招牌樣,如果變咗做朱敏瀚,真係一啲遺和感都冇架!