Patrick Sir正式當爸！冧爆承諾對關宛珊的愛永不變

藝人林溥來（Patrick Sir）今日於社交網宣布正式成為爸爸，太太關宛珊（Kimmy）為佢誔下囝囝林若嘉（Preemo）！佢喺社交網大晒一家三口合照，見佢深情望實囝囝，畫面非常有愛。佢發文透露囝囝尋日（13日）出世，重7磅幾、身長50cm，而且頭大大兼頭髮濃密，似足「洋葱頭」相當可愛。

Patrick Sir又表示：「感恩天主賞賜一份完美嘅禮物畀我同Kimmy，我哋會好好愛護佢教導佢，令佢快樂成長，培育佢成為一位有愛心、有責任感、有能力嘅人，長大後好好咁貢獻社會，為世界帶嚟正面嘅改變。老婆，好多謝你，多謝你咁多個月嚟陀（佗）住BB仔嘅付出！陪住你生嘅時候，拖住你隻手，頭貼頭，嗰一刻覺得你好靚好偉大，你樂天正面嘅態度令我個心好溫暖。雖然我哋已經做父母，但係喺我心目中，你永遠都係我可愛嘅女朋友仔，對你嘅愛唔會有一絲減退。Will love you and Preemo forever！」