謝安琪囡囡讀星級國際幼稚園　一年學費$85,000

香港好多藝人為咗培育仔女，都扭盡六壬，好似張繼聰同謝安琪（Kay）咁，大仔張瞻細細個已經讀國際學校，連囡囡張靖如今亦行哥哥同一條路，入讀一間星級國際學校。

Kay日前喺社交網Post囡囡着住紅色校服嘅相，並寫上：「Who says I have to smile for my year book photo？」以為只係形容囡囡個厭世樣，誰不知睇番個校章，原來張靖已入讀一所星級國際幼稚園。講得係星級，呢間幼稚園學費唔平，大約一年85,000元港幣，2019年該校推出幼稚園債券計劃，購買50萬債券，即可保證優先獲得K1面試機會，成功入讀更可確保由幼稚園直升小學及中學，因為夠晒一條龍，所以深受家長歡迎，而張頴康同麥雅緻囡囡小豆、羅敏莊同陳國邦囡囡陳禛都係張靖校友呢！