軒仔入行廿周年恨開騷 疫情記者會聽到自己名最心噏

2021年04月15日 22:05
東網電視
更多新聞短片
「皇上」張敬軒駕到繽FUN Live,網友一見到他即抵死留言「軟仔」、「乾仔」,他笑言:「好慘,全部都係男人大忌,我終於可以見番同齡人,依家冇人叫我軒仔,剩係叫我軒公,就嚟可以起軒公廟!」講到直播前播出他出道以來的片段,他笑言:「冇諗過咁早可以睇生平,第1條片似嚴重飢餓嘅人,髮型好攞膽。」他又笑言可以生得出曾合作的林愷鈴。
講到他跟林家謙撞樣,他笑言2人可成立組合「TERROR」:「我開頭都唔覺似,第1個話似嘅人係林一峰喺電台同我講,我覺得眼同感覺似,後來同家謙熟咗,原來我哋都有大板牙,笑容好似。」講到之前與馮允謙及林家謙做live,他大讚馮允謙唱R&B好正宗,而林家謙唱demo時已好好聽,唱法好難模仿。
提到在其大宅做Live,他說很喜歡這個地方:「好神奇,聚集好多文人雅士,有神秘嘅吸引力,好安穩嘅感覺。(會一直住喺度?)睇吓港大會唔會加租。(想買?)買唔到,幾百億先得,依家有坐享其成嘅感覺,其實一年交嘅租都唔夠髹牆,幸運可以住呢啲歷史文物。」
講到家傭「遮遮」,他指遮遮經常一個人留在家中,戥她悶,又為她的早餐平反,他說:「佢其實有努力試煮其他嘢畀我,不過食完之後,都係食番白粥算,為安全着想。好似佢煮粟米,我驚食完之後見到記者時一笑,成口粟米粒點算?」
軒仔經常扮嘢,他解釋因為是獨生子關係,自細居住在公務員宿舍,沒有小朋友陪他玩,他說:「我拍片想令大家開心,好似我啲朋友嚟我屋企,佢哋玩得開心我就開心。(扮嘢有冇底線?)心地唔好就唔扮,幽默要有層次!」他說前幾年做舞台劇,學識觀察別人,現在他扮嘢的靈感都來自身邊人。
今年是軒仔入行廿周年紀念,他坦言好想開演唱會:「但要睇疫情,好似之前11月演唱會,原本所plan嘅我都cut咗4成製作,因票房cover唔到成本。可能因為呢幾年,大家睇新聞都知,好多娛樂界嘅前輩,或者最近有電台嘅朋友,好年輕就走咗,所以我而家做大型嘅演出,我係當冇下一次,即係每一次,都係當最後一次去做,所以無論公司嘅經濟條件或者自己體力方面,我都想做到最好。」他又有感而發說:「經過舊年嘅演唱會,我覺得觀眾嘅安全,係我哋做騷最首要考慮嘅條件。我記得舊年有段時間,逢下午4點幾疫情報告會時,係我每一日最辛苦嘅時間,我冇諗過會喺記者會聽到我個名,我覺得作為藝人都要堅守社會責任,經歷好大考驗,無論觀眾感染咗,源頭係咪呢個騷,我都唔安樂。」