戴祖儀沙灘影福利圖　索到男同事即場流鼻血

藝人戴祖儀（Joey）叫得「長腿女神」，一對40吋長腿梗係煞食，呢日佢就上載一張沙灘「福利圖」，身穿薄紗連身裙，隱約透出黑色打底同bra帶，不過重點就梗係招牌白滑長腿啦！佢仲上載一段同負責影相嘅男工作人員嘅對話，自知條裙好短嘅佢擔心問對方會唔會走光，對方就抵死回應：「我攞到最盡呀！」，點知下一秒，佢見到對方有滴血，就問佢係咪整親隻手，但對方自爆：「我流鼻血呀！」

索到令人流鼻血嘅Joey即刻笑到抽搐：「係我唔啱，我會好好反省吓。」一眾圈中好友同網友都笑爆嘴，其中有網友話羨慕嗰個工作人員，又想做工作人員，亦有人話都就流鼻血，而好姊妹曾樂彤就怕佢畀人睇蝕謂：「邊個批准你條裙咁透？」佢即覆：「我期待緊會管我嘅人。」點知曾樂彤就覆：「你經理人。」令佢笑到喊！