何雁詩話咁快「結第2次婚」　焗鄭俊弘課金贈興

歌手何雁詩終以獨立歌手身份推出首張個人專輯《Que Será,Será》，一出碟就即刻落力跑宣傳，尋日（15日）接受電台訪問嘅時候佢笑話緊張到爆炸，感覺似結第2次婚：「緊張係因為在意，前2日係壓力大到爆煲，手震又瞓唔到，好似由頭經歷番第1次嘅感覺，依家隻碟終於出咗世，都好希望自己可以放鬆少少，唔想辛苦咗咁耐，結果好焦慮咁度過成個宣傳期，想享受成果。」

期間佢自爆隻碟差啲臨尾撻Q，事關3日前佢去印刷廠攞碟先發現自己個名串錯咗，搞到佢勁崩潰又懊惱：「之前冇Check清楚，好彩間印刷廠好幫手，即刻趕工再Print，真係今日（出碟當日）趕到去唱片舖！知道隻碟未必係市面上最好嘅Product，但佢係我用100%嘅努力做到最好，之後會再學習做好啲！」事後問到佢會唔會都買番幾隻碟攞好意頭？佢笑話有留咗啲貨嘅，但大多數都係用嚟宣傳嗰陣送畀啲DJ：「自己嘅未諗，最主要有叫老公（鄭俊弘）撳多啲錢，因為聽日（17日）會去唱片舖做宣傳，佢最少要買100隻啦！哈哈！」