張恒抱B出遊令「小三」曝光　鄭爽已與仔女同住

內地女星鄭爽同張恒撫養權糾紛案未完，雙方頻頻出招，近日張恒就被網友偶遇佢帶一對子女出遊，同行仲有疑似張母，該網友稱張恒對小朋友好有愛心，一時抱一時孭住咁同小朋友嬉鬧睇風景。正當張恒形象轉好之際，有網友就發現自稱「偶遇」張恒嘅女博主，曾經晒出自拍，配文：「張恒，等你贏了官司，我就嫁給你。她的一切都是咱們的。」即被質疑女子有機會係鄭爽早前口中所指嘅「小三」！

同時網友質疑今次「偶遇」係精心策劃，加上其中一張相見到張母舉機為張恒拍低一手抱兩個小朋友嘅相，似係為張恒打造好爸爸形象。此外，張恒同張母均以夏天衫上陣，不過目前美國天氣較寒冷，照片似係舊照，而且小朋友年紀亦唔符合，如果係舊年夏天，一對子女只有半歲多。

照片曝光後，多次為鄭爽辯護嘅好友就公開指，兩個小朋友頭髮比較少，遺傳鄭爽細個嘅頭髮稀少，直指張恒手抱嘅唔係佢哋仔女，並提到依家鄭爽已經同孩子同吃同住。