何雁詩自資出碟！鄭俊弘開「百萬支票」做苦力

歌手何雁詩推出全新EP，今午她與丈夫鄭俊弘（Fred）現身太子影碟店宣傳。Fred相當識做，自掏腰包數千元買愛妻唱片，又開「百萬支票」給對方以作支持。事後二人更情侶檔上街busking，阿詩自爆：「以前有唱片公司同事幫手，依家自己做啲貨（唱片）放晒喺屋企，再咁落去要換間大啲嘅屋先得。今朝都係靠佢（Fred）幫我做苦力。」

問到她會否覺得以往有唱片公司支持好，她笑答：「各有各好，依家係喺我能力內，已做到100%。（考慮簽番唱片公司？ ）其實一直都有傾緊，不過我想諗清楚啲，唔想浪費幾年時間。（想同老公同一間公司？）唔一定，最緊要事業前途行先。」

Fred被問到有否聯絡舊唱片公司高層何哲圖，他說：「未呀。（佢搵你呢？）食飯、飲茶啦，好耐冇見。（嚟緊都會專注拍劇先？）係呀，會同洪永城拍驚慄電視劇。（你本身好大膽？）唔係囉，以前拍過類似題材嘅嘢，梗係有啲怪事發生，好似明明roll咗機，但最終原來冇，無端端又爆燈膽等等，真係要拍拜神同攞利是求心安。（老婆大膽過你？）應該係。」