初戀傷得深　陳瀅再揀男友要呢方面技術好

藝人陳瀅今日出席劇集《伙記辦大事》宣傳活動，提到在劇中有學生妹造型，她稱可一不可再：「演年紀大過自己係容易過演年紀比自己細，因為已經有好多經歷，好難演番初心同單純嘅感覺。我有兩劇同時播，賴慰玲同蔡思貝話同一晚睇到兩個唔同陳瀅，但係學生妹就有啲卡住，可能下次要搵另一個人扮我學生版。」

而在劇中她有場戲對住前度爆喊，她坦言拍攝時想起初戀男友：「佢係傷得我好深。（點樣傷你？）有背叛同有啲推撞，但我好鍾意佢。（經歷好慘？）好多關係都會有爭拗，只可以話佢唔係好嘅初戀。」她指人生中拍過4次拖，自言第5個未出現：「我要開工冇時間去識人，朋友戥我心急，我有日同朋友食飯，有4個人都話要介紹男仔畀我識，但我好怕呢啲，覺得尷尬。」

另外，她透露原本為劇集而考電單車牌，但最終失敗：「考到強制試，我上電單車唔夠3秒就跌咗落嚟，所以拍呢套劇好安全，全程有替身。（會唔會再考？）唔會，一把年紀，唔想自己生命有危險。揀男友都唔可以揸電單車，因為危險，但要識揸車，同技術要好。」