敖嘉年成日被易角　好在個角色冇爆

藝人敖嘉年及徐加晴下午現身觀塘開Live。談到主演劇集《欺詐劇團》已上架，嘉年開心表示：「反應真係唔錯，好感恩。（你演嘅導演好落泊，現實生活中有類似嘅經歷？）我演嘅導演角色甫出道就攞獎，以為自己好叻，所以得罪咗好多人。我本身就冇（得罪人），但過往10幾年都成日遇到易角事件，本來個角色安排咗畀我，後來變咗唔係，唔知原因，但呢啲情形經常發生。（有冇角色換咗人之後，爆咗出嚟？）好彩冇，反應只係ok啫。」

他又謂拍《欺》劇期間，其中一場戲交代自己被Ban橋：「拍到感同身受，Cut機就喊咗出嚟。其實年頭我睇番《喜劇之王》，莫文蔚同周星馳講佢嘅角色畀咗其他人，以前睇到會笑，依家識喊，感受好唔同。」

徐加晴即自爆以往唱Demo時，試過獲邀唱電影主題曲，原本以為機會難得，豈料最終主唱一欄卻換上一位內地歌手名字：「把聲係我，但唔知點解，嗰時得15、6歲，唔開心一定有，但唔敢問點解！」