開心大綜藝:C君惡搞方東昇《沉人記》 江美儀神還原莫文蔚

2021年04月18日 21:46
東網電視
更多新聞短片
《開心大綜藝》今晚第2集,打頭陣是電影《總是有愛在隔離》一班演員張智霖、張繼聰、錢嘉樂、方力申、蘇麗珊等,大談拍戲趣事,其中,講到陸永與蘇麗珊的咀嘴戲,2人大爆原來是導演臨時加插!
論到最好笑當然是該節目的「招牌菜」扮嘢環節,先由搞笑能手C君玩轉《尋人記》主持方東昇,化身為《沉人記》的「方東降」,他尋找上星期獲得5,000蚊獎金的現場觀眾Tina,並上對方屋企摷電費單,全程大講金句,當中包括他笑言:「Tina斟咗杯水畀我,我飲咗Tina(天拿)水!」全場笑爆!
之後於「扮嘢哲學」環節,江美儀與盧宛茵「扮嘢」鬥一番,江美儀扮莫文蔚變「莫文偽」大唱惡搞版《呼吸有害》,無論外型以及笑容都似足「真身」莫文蔚,尤其揈手彈古箏,更加形神俱似!反觀,盧宛茵扮衛蘭變「米蘭」唱《大哥》,外形已經「贏咗一半」但可惜有少少甩嘴,結果,由江美儀大比數贏出!
至於第2 Round,林盛斌扮凸肚版郭富城,大唱搞笑版《對你愛不完》,造型相當「亮眼」,而吳嘉儀則扮JW唱歌,之後更與「真身」JW共唱,但可能因「珠玉在前」,表現只算中規中矩,結果,由林盛斌勝出,他還「加演」用郭富城舞步大唱黃霑的《滄海一聲笑》,獲錢嘉樂讚扮黃霑唱腔極神似。