獲封最災難藝人 王祖藍「宣布」永久離開《開心大綜藝》

2021年04月18日 23:38
東網電視
更多新聞短片
《開心大綜藝》高潮一浪接一浪,於上集扮高官玩自嘲的首席創意官王祖藍,成功令觀眾笑破肚皮,今集節目將網上的負評自抽,舉行一個名為「公關災難頒獎典禮」,其中銅獎得主為「嗰班藝員冇人識」,暗諷部分藝員冇人識;銀獎得主為「呢班老友記先啱睇」,回應網民取笑節目「食老本」。
另外節目亦把旗下藝員擺上枱,當頒發金獎給林盛斌(Bob)時,他便於台上惡搞今年「萬千星輝頒獎典禮2020」,王浩信奪視帝發表得獎感受時,太太陳自瑤於台下「黑面」的經典場面,Bob更抄足浩信當晚致謝詞:「我要多謝太太Pearl,佢將屋企照顧得特別好,令我可以努力工作。」其太太Pearl更交足戲,全程木無表情,就連在旁的吳若希也睇到「O嘴」!
至於「最災難藝人獎」就由被稱為「毫無創意創意官」的王祖藍奪得,主持森美更抵死指他在電視製作人員訓練班進修,而祖藍則透過短片發表講話,內容幽默又搞笑:「上星期製造咗一個好大嘅關公災難,所以我要自我隔離,繼續食番我喺獎門人入面贏番嚟但未食嘅花之戀壽司。」
王祖藍續說要自我反省,又話高層曾志偉要「孭飛」外,說稍後將開發新節目《廁所辦大事》,屆時會深入探討廁所文化,繼續研究同發揮抽水功能:「好多網民話我哋又係做番福祿壽,我係要深切反省,我係唔應該叫陸永上台,我係應該叫番李思捷返嚟。我哋嘅副總經理(曾志偉)亦責無旁貸,佢從來冇講過蘇永康同曹永廉係年輕人嘅偶像,但經過網民改圖之後,一言驚醒夢中人,我哋會搵佢哋返嚟,聯同另外兩位年輕人偶像胡楓同羅蘭,一齊主持新版嘅《#後生仔傾吓偈》。」
他更聲言永久退出《開心大綜藝》:「我決定永久離開《開心大綜藝》呢個舞台,衷心多謝台前幕後,兄弟姊妹們,希望你哋愈做愈好,我希望你哋永遠懷念我。」其實他並非永久離開節目,只是玩「自抽」營造節目效果!
原定晚上10點30分完結的《開心大綜藝》,遲了15分鐘才完場,事後曾志偉受訪時,指因玩遊戲環節長了,至於會否需要罰錢?他謂:「只要冇影響新聞報道嘅時間就冇事,今次延長至2小時嘅主要原因係myTV SUPER 5周年同埋要宣傳1部電影、2套劇。」
至於有指今晚節目突然再加長15分鐘,由原本8個環節變為9個 ,是為了與ViuTV Chill Club音樂頒獎禮對撼,志偉否認:「上個星期佢哋(《最後一屆口罩小姐》選舉)都Overrun咗,呢啲邊有得預。」