仲未見過林峯囡囡!林夏薇押後生B大計?

20210419
東網電視
更多新聞短片
林夏薇仲未見過林峯個女。
藝人林夏薇(薇薇)為無綫新節目《好聲好戲》擔任打氣評判團。受訪時,提到堂兄林峯上年9月升呢做老竇,她早前曾表示未見過林峯女兒真人,她透露原來至今仍未見過姪女,並希望可以盡快通關:「有視像嘅,之前買落啲衫仔想寄畀佢,但都寄唔到,最怕Size唔啱。(唔啱就留番畀你自己嗰個?)咁個款會過時喎!」
問到幾時進行生B大計?她表示一直以來都沒有着急,連自己的父母和朋友從來冇替她急過:「本身想順其自然,私下亦完全冇諗呢樣嘢,之前拍少啲戲,多啲時間放喺屋企,但又要搞生意,分配唔到咁多時間,生B陪伴係好緊要,暫時都未有呢個時間,放慢腳步先。」
向前輩偷師
講到這次前來為《好聲》參賽者加油、打氣,問到為何不參賽?她笑謂因為名額已滿,今次就當是抱學習心態,前來向前輩偷師:「覺得配音前輩好犀利,好考專注力、反應、觀察同想像力,自己之前都有配音經驗,配過動畫入面嘅男仔小朋友,同埋有時拍劇都要配番自己音,但已經好難,如果要配喊戲就要由頭演多次。(想挑戰配咩角色?)或者係女仔小朋友,自己唔係專業,揀番啲同自己聲線比較接近嘅角色好啲。」另外,她對配韓劇都有興趣,特別是壞女人角色:「挑戰唔同嘅感覺,奸角有發揮空間。」