佘詩曼突破盲點　解開中國名畫千古謎題？

佘詩曼唔只廚藝了得，原來對中國文化都好有研究，拍過唔少古裝劇嘅佢，對中國書畫尤其興趣極深。近日佢上內地節目《書畫裏的中國》，節目首集介紹唐代畫家張萱嘅作品《虢國夫人遊春圖》，畫中相傳有楊貴妃嘅堂姊妹虢國夫人，但畫中從未被指出邊位先係虢國夫人。

但阿佘一眼就突破盲點，話畫中人雖然衣着有男有女，但其實全部都係女人，皆因當時有一種「三白法」嘅畫法，畫中人物額頭、鼻樑同下巴點上白色，代表係女性妝容，圖中有4匹馬掛上紅纓，就係貴族認記，而為首嗰匹馬嘅馬鬃分為「三花」，係宮廷御用坐騎嘅標記，所以推斷帶頭嘅人就係虢國夫人。阿佘此言一出，令全部人目瞪口呆，網友更話佢解開千古謎題，大讚佢美貌與智慧並重。