同唐詩詠撞樣有着數　24歲陳嘉慧搶灘愛上胡鴻鈞

現年24歲的無綫新人陳嘉慧（Erica）受到監製賞識，跟胡鴻鈞一同主演新劇《愛上我的衰神》，劇中二人有感情線。之前她參與過不少劇集演出，當中包括《愛．回家之開心速遞》、《伙記辦大事》及《迷網》，現時亦有主持兒童節目《Think Big天地》，首次有重戲份的她坦言被選中飾演《愛》劇感到很興奮。樣子清純的她被不少網民讚貌似唐詩詠及劉心悠，而《愛》劇監製方駿釗亦不諱言今次揀選她，是因為她有一份日本女仔的清純味道。

Erica於12歲時跟母親移居日本，於當地成長的她畢業於日本櫻美林大學，2017年返港加入無綫藝訓班，翌年正式入行。說到與胡鴻鈞合作，她坦言：「我知佢係邊個，但工作上冇合作，佢唱歌好好聽。（會否有壓力？）Casting時完全唔知道咁多戲份，監製冇同我講，唔知咁有挑戰性，其實個角色都幾似自己，斯文、感覺上好善良，都係啱啱出嚟社會工作。」

她又自爆原本有機會參與劇集《陀槍師姐2021》，但當時身體不好入了醫院，錯失這個機會，她謂：「可能自己平時冇乜調理，但照過磁力共振Check過又冇嘢，淨係覺得身體好唔舒服，可能係因為免疫系統弱，所以成日發燒。」問到最想跟誰合作？她謂：「我想同賴慰玲合作，之前拍《伙記辦大事》時見過佢，好欣賞佢對做戲嘅熱誠，我視佢為學習對象，希望有機會合作。」

Erica 21歲從日本返港，曾想過參選港姐，但最終選擇考訓練班，她解釋：「我冇乜自信選美。（邊方面冇自信？）唔夠靚，多方面都自信不足。（最滿意自己啲乜？）個鼻囉！右邊面比較特別。」她有一位圈外男友，但相當低調，坦言想專注事業。問到覺得日本男仔與港男有甚麼分別？她說：「香港男仔會以女仔行先，比較細心、Gentleman啲，而日本男仔就偏大男人，可能食飯都係由女仔夾餸畀男仔多。我鍾意啲細心又成熟穩重嘅男仔，每個女仔都鍾意被照顧。（有冇同日本男仔拍過拖？）冇，媽咪好嚴格，而且細個讀女校，性格好Cool，去到大學時唔係好識同人溝通。（有冇試過告白？）冇，屋企好嚴，一直掛住讀書。」

Erica表示日本女校與香港女校都大有不同，一般人覺得日本女仔返學一定化妝、染個靚髮，但其實不是，她笑謂：「自己讀私校，比一般公立學校嚴格，日本公立學校係可以化妝、染髮，但私校唔可以，香港同日本最唔同嘅地方係校服方面，日本校服裙標準係膝頭哥對上16cm，呢個係標準，但香港太短唔得，我哋落雪都係着短裙，好凍。（有冇男生等放學？）冇，好嚴，會畀老師趕走。」

對於被網民指似唐詩詠，原來就連陳山聰都曾於公司認錯她！Erica笑言之前有一天於公司停車場被叫停，原來是山聰，她說：「當時我有啲嚇一嚇，我問佢：『你嗌我呀？』佢話：『唔好意思呀！我認錯人。』轉頭喺化妝間見到詩詠，佢話：『頭先佢（陳山聰）喺停車場以為你係我呀！』」

Proflie：

生日：5月30日

身高：163cm

體重：48kg

嗜好：唱歌、彈琴及戶外運動

場地：RISE KITCHEN

化妝：lin@linworkshop

髮型：Terrence Chan@Hair