同黃嘉雯傳緋聞　陳家樂一早知被人攻擊

藝人陳家樂出席抗疫電影《總是有愛在隔離》首映禮。對於與前港姐黃嘉雯傳緋聞，他連聲否認，但原來自己一早已知「箇中底蘊」，他說：「嗰個讀者好無聊，其實『事發』幾日前，佢已經喺社交網留言攻擊我，然後又向我啲粉絲埋手。我唔想中佢計，所以冇理，唔想畀機會佢。（起佢底？）係假帳戶嚟嘅，唔緊要啦，最緊要係大家知乜事，得啖笑，佢要零分重作。（咁再傳你同第二個喎。）係喎、係喎，係應該叫佢唔好再作喇。」

他自言現在感情生活隱定，自己會努力工作。談到他於社交網發文澄清，獲女友連詩雅畀like，他說：「唔好講邊個畀like，朋友支持就得。」