唔認係控制狂！蘇麗珊反指男友愛管異性Friend

藝人蘇麗珊於電影《總是有愛在隔離》中，與陸永飾演一對夫妻。劇情交代二人原本到酒店試菜，竟突然遇上疫情爆發，被迫隔離14日，在隔離期間兩人相當緊張，加上她是「控制狂」，彼此產生拗撬。

問到現實中她是否愛控制男友？她笑答：「佢一定覺得我係，我自己就唔覺囉。佢有時都想控制我，拍拖嘅嘢雙向啫。（佢想控制你啲乜？）異性朋友，咁佢都有好多女仔朋友，我都會呷醋。依家分批約自己最好嘅朋友，介紹畀對方認識，見晒面喇。（咁不如牽吓紅線。）都有介紹大家做吓朋友，但暫時仲未有一對成事啫。」