麥明詩復出拍亞視網劇：開心公餘時間維持到興趣

「十優港姐」麥明詩2019年放棄無綫藝員包薪合約，改簽「1年1騷」制，從回老本行到律師樓當顧問工作。有消息指佢將會復出拍劇，但唔係重返娘家，而係為亞視拍網劇，並由戚其義監製嘅時裝愛情劇，與黃又南、黃德斌、林耀聲、陳雅麗、黎紀君等合作。有指今次出動亞視副總裁、亞洲心動娛樂（AMM）香港區副總裁林文龍親自向無綫高層樂易玲借人拍攝，由於係網劇並非免費頻道，故同無綫冇牴觸。

麥明詩接受東網訪問時表示：「係有咁嘅事，其實都係林文龍先生同樂小姐傾嘅合約，好開心可以促成到件事，因為戚其義係我一位好欣賞嘅監製，我可以喺公餘嘅時間維持到我嘅興趣，我覺得好開心。」

劇中黃又南同一位新人配成一對，而麥子樂則與麥明詩有大量對手戲，麥子樂表示：「最後一部同戚其義合作係《天與地》，但大家關係一直友好，對方話開電視劇，自己一定要支持。（同麥明詩演對手戲？）呢啲等30號記者會嘅時候再公布啦。」