譚嘉儀被抨擊歌藝　匿埋喊爆想放棄

歌手譚嘉儀在觀塘為直播騷演出並宣傳新歌《好情人》，講到何雁詩在新改革的《勁歌金曲》中唱新歌時，被「音樂選民」批評到喊，問到嘉儀可有膽量上節目測試歌藝？她笑說：「我都期待有機會參加，不過，睇到何雁詩都有啲心噏，如果自己上節目都要好好準備接受批評。其實做歌手咁耐，有批評係好事，不過，唔知到時會唔會喊，哈哈。」她又指以前作品曾受到抨擊，自己匿埋喊，亦有想過放棄唱歌。

講到星夢執位後可會減少曝光機會，她說：「咁又冇，不過，自己都會盡責任，盡量宣傳新歌，好似喺自己網上頻道就同羅天宇一齊玩揸車學飄移。」問到技術可有嚇怕天宇？她笑說：「佢揸車就穩陣啲，因為以前我揸開電單車，我就安全地快，佢都幾欣賞我手車嘅。」