張栢芝倒立失手整傷腳　自爆出事原因係…

藝人張栢芝喺內地密密搵人仔，最近仲傳佢打算帶埋3個兒子Lucas、Quintus及Marcus長居上海添！佢早前遭內地綜藝節目《乘風破浪的姐姐2》淘汰後，將社交網改名做「我是張百知」重新出發，但今日佢已經將網名改番做「張柏芝」！

平時熱愛做運動操Fit嘅佢，喺社交網晒出自己做倒立時，不幸受傷嘅片，睇見佢喺片中行起上嚟趷吓趷吓，佢又用唔鹹唔淡嘅普通話，夾咗啲英文同廣東話，講述自己嘅傷勢，令人唔係好聽得明囉！大概就係話佢隻腳腫咗，連行路都痛到爆炸呀！佢留言：「明天肯定腫到不得了（現在躺在床上感覺愈來愈痛）。」

出事原因

佢仲帶網友去番「出事現場」，見佢喺地上鋪塊瑜伽墊同毛巾，話佢喺做倒立嗰陣，大頭蝦唔記得自己原來搽咗Cream，搞到勁跣，所以失手撻落嚟，連佢紮頭髮個髮夾都整爛埋，真係激死佢！網友睇見佢咁慘慘豬，都紛紛送上祝福，希望佢冇咩事，可以盡快好番啦！