學識樂觀面對負評！胡鴻鈞唔排除做跳唱歌手

藝人胡鴻鈞（Hubert）接受無綫娛樂新聞台節目《StarTalk》專訪，談到新歌《整親》有自嘲成分，當中歌詞更加提到「刀削面」，他坦言：「呢首歌係總括我入行以嚟外界對我嘅評語，經歷咗咁多年，到呢刻再次面對，喺自己心態上嘅轉變，希望帶出正能量畀大家。今年推出嘅歌曲會係講自己經歷過嘅事，好想每年推出一張概念專輯，完全記錄自己，剖白胡鴻鈞究竟係咩人。」

談到昔日負評時，Hubert透露：「我唔係成仙成佛，對所有評論冇感受就假，之前面對負面評論時可能唔知點面對，一定有情緖，依家要學懂平衡，識得用樂觀心態面對。」他又指想改曲風：「想跳出框框，自己都唔甘於淨係唱慢歌，希望透過歌曲畀樂迷知道我其他嘅可能性，或者有一日我都能夠變成跳唱歌手或者Rapper。我覺得跳舞會令自信多咗，更加認識自己，之前睇電視見到鄭欣宜又跳又唱，畫面好震撼，好吸睛，我直頭呆咗咁睇。」