安全要有一罩!王嘉爾龜縮喊驚 陳豪「抗旨」罩不離身

20210427
東網電視
更多新聞短片
口罩,已經成為大家每日出門口嘅必需品,加上政府加強立例,相信大家都唔會以身試法。不過圈中藝人就難搞啲,要出鏡又要騷靚樣,好多時佢哋喺鏡頭前都刻意除罩,拍攝完就戴番口罩,一戴一除,有時都真係好易唔記得…
好似韓團GOT7前香港成員王嘉爾(Jackson)咁,佢依家主力攻內地市場,早前結束隔離後即刻投入新工作,一身黑衫黑褲加墨鏡嘅造型踏出酒店門口,霸氣十足嘅佢仲一個箭步行近大批粉絲,點知佢就忽然發現自己原來冇戴罩,嚇到佢神色慌張,縮起個人鬼祟戴完口罩先敢跑出嚟見人,畀粉絲狂笑佢有反差萌,果然真係命仔要緊。
其實唔止佢,視帝陳豪都一樣緊守防疫防線,平時出席活動時佢都鮮有除罩,估唔到舊年無綫台慶,全體藝人就戴上透明膠口罩,佢就幾乎全程戴口罩,講到明:「我情願犧牲少少個樣嚟換安全!」老婆陳茵媺更加大爆佢喺屋企幫大仔剪頭髮都戴口罩,堅持兩個字真係唔係個個做到。
不過好多時藝人都身不由己,好似早前台灣歌手張韶涵、大陸藝人胡海泉、李汶翰等出席歌唱節目《天賜的聲音》時,竟然被要求戴上透明嘅飯堂阿姐口罩,雖然擋到飛沫,但唔密封仲露埋個鼻,認真搵命博。當眾人上堂獻唱時,就連口罩都剝埋,現場有大批觀眾坐喺台下,真係走都冇得走呀…
----------------------------------------
世事如棋局局新,娛圈熱話數之不盡,唔想Out、唔想同班Friend冇話題?就一定要留意繽FUN專題嘅「熱話」喇!