梁思浩生日收禮物！將68份愛送出令功德圓滿

藝人梁思浩圈中朋友眾多，日前24號是其正日生日，一班網台拍檔如李思蓓、韓君婷為他在主題公園的宴會廳舉行驚喜生日會，令他變身成為「王子」，他接受訪問時表示：「喺幾千呎嘅宴會廳，我就好似王子一樣，同14位好朋友一齊吃飯，現場仲有12名大廚，再加12個侍應，真係好似喺王宮開派對咁。」問到好友韓君婷送了甚麼禮物，他大讚對方有心：「佢親手做咗小禮物畀我，真係好珍貴，我仲未捨得拆。」

除了正日生日外，原來整個4月來他不停和朋友慶生，他說：「因為疫情嘅關係，唔可以一次過太多朋友一齊食飯，所以要分開好多次，禮物都收咗好多轉，有無數個蛋糕、又有50隻鮑魚嘅花膠煲，好多花束同香檳。」他為感激朋友滿滿的愛，決定將68份心意轉化為愛心：「每一個同我慶祝生日朋友，總共68人，我會用佢哋嘅名字去派飯共68日，每個名字1天，將功德全歸佢哋。」