黃嘉雯又有新搞作 學插花恨開實體花店

20210427
東網電視
更多新聞短片
前港姐冠軍黃嘉雯興趣多多,私下經常上興趣班自我增值,最近佢就去咗上插花班,仲將製成品放上社交網開心Share,美人配靚花,賞心又悅目!佢接受東網訪問時講到啱啱先開始上初級班,仲話自己本身好鍾意花,平時都會買花返屋企裝飾,睇見心情都會靚啲,佢話甚至連朋友生日都會送花,所以先有個推動力學呢門手藝:「依家買花真係愈來愈貴,既然自己又鍾意,學咗可以玩之餘,又可以包嚟送畀朋友,有心意又好玩!」
佢自爆有次整花材料唔小心被玫瑰花拮到手指流血,不過冇因少少受傷就輕易放棄:「插花真係好似藝術品咁,每個作品都唔一樣,每一次紮又唔一樣,第1次紮都重複做咗好多次,錯咗又拆咗佢重整,所以親手整一紮花都係心機嚟,希望母親節可以親手整1紮畀媽咪!」
問到最困難係咩?佢笑話有時要紮大紮啲嘅花就要搵「救兵」幫手:「好似要紮50枝花都好難㗎啦,兩隻手都未必拎得晒,不過紮完又超級有成功感!」同時佢自爆有想開花店嘅衝動:「如果開咗花店就可以日日對住啲花,同埋學多啲唔同品種嘅花,好多花嘅品種都係上堂先認識。」