女子組合Bingo成員Carman（關嘉敏）自參加完《全民造星III》後人氣急升，最近被日本藝術攝影雜誌誠邀任新一季模特兒，同季還有日本男神福山雅治。首次衝出香港為日本雜誌拍攝及初嘗人體彩繪的Carman，當得知要拍人體彩繪靚相時有點膽怯：「始終未試過挑戰自我性感極限，今次都算係我出道以嚟最性感嘅一次。」而攝影師在拍攝前送上大疊參考資料，亦跟她開會商討拍攝形式，最後揀中以蝴蝶為主題。她說：「我都好鍾意蝴蝶，覺得佢哋嘅形態好靚，有好多嘅可能性，我都希望自己喺事業上都似隻蝴蝶咁，破繭而出呈現到更多唔同嘅自己畀觀眾睇到。」

她又說化妝師畫人體彩繪時，第一個動作是「縮」：「因為冇着衫，化妝師第一吓落筆時，真係凍到縮咗一下，不過睇到啲相又好開心，真係影得好靚，好感恩有機會參與拍攝。」又指拍攝工作本是在日本進行，可惜因疫情關係而告吹，希望將來再有機會到日本公幹。