想阿女林愷鈴帶男友返屋企？龔慈恩畀咁嘅反應

藝人林愷鈴（Ashley）與媽媽龔慈恩到電視城為節目《日日媽媽聲》錄影，問到母親節有何表示？Ashley笑言：「講咗就冇surprise。」龔慈恩亦幫口表示：「佢唔會送禮物，但會自己DIY送啲小手作，例如試過寫卡、整早餐畀我食，又用長笛吹首歌畀我聽，好有心思，總之見到佢同個仔就好開心，如果冇禮物，但見到佢哋，有人畀我鬧，我就ok啦。」問到可想囡囡帶個男朋友回家？她即望住囡囡，Ashley即扮聽唔到，她續謂：「佢開心就好，佢開心我就開心，冇壓力，雖然我都有啲希望，哈哈。」

Ashley就坦言：「依家冇拍拖，因為學校同工作都好忙。」龔慈恩又話女兒近日要趕功課：「因為佢讀建築要砌模型，搞到成廳都亂晒，心痛佢做到隻手都爛晒，幾晚冇瞓覺，叫佢take it easy，不過我都欣賞佢認真。」講到媽媽很矛盾，Ashley笑言：「所以好大壓力時，佢就叫我take it easy，但當我hea時，佢就叫我認真，永遠都係做Balance。」