同朱晨麗咩關係?何廣沛自爆拍拖最短10日就分手

2021年04月30日 23:16
東網電視
更多新聞短片
藝人何廣沛與朱晨麗傳緋聞多年,他笑言因合作較多所致:「我哋係比較深入民心,每個演員都希望大家記得自己,螢幕情侶有人記得係好事,證明我哋成功咗,我覺得厭還厭, 但我受!」問目前有否拍拖?他故弄玄虛說:「你估吓!我會集中事業先。(唔公開?)順其自然,我呢5個月試好多唔同方向,冇時間諗其他嘢,希望可以去到一個位置,令我之後可以成為心目中嘅男人, 一步一步向前推動。」
他在劇集《愛美麗狂想曲》飾演手遊公司老闆,有錢有才又年輕,追女仔勇於表白又浪漫到極致。不過,他指自己在感情世界屬於較為被動及怕醜類型,雖不及劇中角色浪漫,但都會為另一半花心思:「我唔識煮嘢食,但為對方煮嘢食同整生日蛋糕都試過,雖然我勞作同畫畫唔叻,冇藝術天分,但我想畀對方感受到心意。」劇中,他與李佳芯共譜姊弟戀,現實中他就未試過:「拍呢套劇之前,如果姊弟戀,相差5至10年,我未必會接受。拍完呢套劇發現年齡都唔係啲乜,最重要啱Feel。(母子戀呢?)唔得,10年或以上係心理關口。(細你幾多可以接受?)以前拍拖對象都只係細我2、3年,如果對方20歲,我溝通唔到, 大家文化差好遠,好難想像。」
5年情盡 檢討不足
問到拍拖經驗,他透露最長一段感情是5年,最短只有10日,因為開始之後隨即展開半年遠距離戀愛:「嗰半年冇見過面,好空虛,只可以靠長途電話聯絡,我唔覺得係拍緊拖,喺冇感情基礎下開始,好難維繫。我覺得如果明知一個月後就走,但仍然去開始一段關係,係不負責任,但當時我係喺不知情嘅情況下開始。」他慶幸每次都是和平分手,從沒涉及第三者。至於5年情盡的原因,他稱主要是雙方價值觀不同:「女人永遠比男人想得遠,我嗰刻唔夠成熟,佢要嘅嘢嗰刻我畀唔到,所以係一個好經驗,知道自己嘅不足,上咗一課,希望未來唔好重蹈覆轍。」
他曾經希望28歲成家立室,可是入行後就再沒這個想法:「5年嗰段戀情令我發現自己不足,我知道如果要結婚,我嘅事業應該要去到某一個成就、一個位置令對方生活無憂,我覺得未做到,所以唔諗住。我仲可以喺事業上再努力,有能力照顧對方先諗,有啲人會話結咗婚先一齊捱,我反而唔想。(對自己事業有咩要求?)能夠做到安穩生活,呢行好多不明因素,唔係你可以控制。(買樓先?)最好啦!我連樓都冇, 幾唔穩定。」
手停口停 反思創業
大學讀會計,但他忠於自己,決定入行做藝人,由於初時收入低微、工作機會少加上競爭大,令父母非常擔憂。而收入最低的時期, 應是當年讀訓練班:「真係得車馬費津貼,好在我之前有做兼職,有積蓄,我喺美國連傢俬都搬。(當時畀父母經濟封鎖?)又唔係,只係唔會畀錢你,但有間房畀你瞓,當時好節儉,逼你一定要向前行。」
直至近年在圈中略見成績,父母開始放心,可惜疫情來襲,5個月冇工開,兩老又再為他憂心忡忡,不禁令他作出反思:「唔想限於演員身份,娛樂圈真係手停口停,呢一刻慶幸仲有劇拍,如果自己身體問題唔再適合拍劇, 我仲有咩選擇?呢個係疫情帶畀我啟示,我開始去做生意仔,已經運作中,F&B(餐飲)、網上商店、App都有,同唔同老闆、拍檔合作。」
Credit:
髮型:Ray Hui @Bellus Salon
化妝:Jeff Tang
服裝:MYND
場地:Da Filippo Trattoria @Harbour City