姜大偉曹永廉教路搵方向　姜卓文考慮簽無綫

藝人蕊蕊及姜卓文等下午到尖沙咀出席市集活動。蕊蕊一人擺放3個攤檔，宣傳其代理健康食品及水晶外，亦推廣自己負責籌辦的選美活動，她直言有意於疫情過後，與友人合辦實體水晶店。談到未來工作，她坦言要等通關：「如果通關嘅話，我會幫台灣電競品牌拍代言廣告，而且選美活動嘅佳麗都要到台灣受訓，舊年已經停辦咗，希望今年睇吓搞唔搞得成！」

姜卓文則表示忙於拍攝無綫劇《青春不要臉》，劇中扮演幕後工作人員，佔戲頗多，拍攝時他難忘其中一場經典動作場面，結果搞到七國咁亂：「我個角色要負責打掃。（簽無綫？）依家仲係自由身，簽約嘅嘢想考慮清楚。（爸爸姜大偉同姐夫曹永廉有冇畀意見？）爸爸叫我自己決定，但要累積吓啲經驗，好好裝備自己，而姐夫就叫我一定要做自己，清楚搵到方向。（今次拍劇爸爸幫你拉線？）可以咁講，不過我同導演好熟，都要參加試鏡先成功爭取到機會。嚟緊我希望拍劇同音樂兩邊同步，能夠成為一個全能嘅藝人。」