黃建東何遠東組「情侶檔」：我哋公開徵婚

藝人黃建東與何遠東早前分別宣布積極瘦身，獲纖體品牌安排兩人齊齊擔任代言人，想不到一拍即合，近日經常以「情侶檔」姿態現身，合擺心形甫士讓記者拍照，令人忍俊不禁。他們受訪更表明希望「雙番東」能夠持續合作：「梗係想有長遠嘅合作計劃啦，無論做乜都得，順便同廣告商講聲，其實我哋真係好抵用。（不如直接改個組合名啦！）有諗過㗎，依家公開招募，粉絲可唔可以幫吓手諗呢？有idea就出聲。」

黃建東笑言羨慕何遠東減肥成功﹕「呢排好多人話，其實我肥過佢！」何遠東即接口：「咁我都羨慕佢身邊成日有靚女。」兩兄弟同屬單身，記者笑問何不互相介紹女友，何遠東笑謂：「我哋公開徵婚啦，不過其實我都有好多女性朋友嘅，好似小寶、細細粒同陳嘉佳咁。（同1個人喎。）係呀，佢已經返咗香港等開古裝劇，我梗係第一時間約佢敍舊，交咗人喇。」