同譚嘉儀學唱歌　馮盈盈希望由谷底反彈

藝人馮盈盈與譚嘉儀到電視城出席《好聲好戲》記者會，講到盈盈之前在《開心大綜藝》唱歌走音，要搵嘉儀拜師學唱歌，嘉儀說：「我梗係收佢啦，我聽過佢唱歌，其實佢非常有潛質，把聲夠響，絕對有得改善。」盈盈說：「第一次有人咁樣讚我，我哋約咗下個禮拜學唱歌，希望可以拍低個過程，睇到我由谷底進步，化腐朽為神奇。」嘉儀又笑言自己不會鬧學生：「唔使鬧，一齊研究。（對住盈盈有冇耐性？）我對住所有學生都好有耐性，盈盈絕對唔難教，對佢好有信心。」盈盈即說：「好感動，佢畀咁多正能量鼓勵我，令我充滿信心，又唔收我學費，我請佢食番餐下午茶。」

講到好友麥明詩復出拍亞視網劇，問到可有聽對方提此事？盈盈說：「冇特別提起。（佢同你打對台？）唔係，任何電視台、平台都唔係對手、敵對，我哋都係想為香港娛樂事業出一分力，一齊做大個餅。（你會想出去試吓？）咩工作機會都歡迎，但要搵我經理人傾。（平時有聯絡？交流演戲心得？）有Keep住聯絡，我邊有演戲可以交流，我哋會交流其他方面。」