戒走懶音！馮盈盈自揭醜態喊到豬頭　網友讚呼聲高

尋晚無綫推出向配音員致敬嘅節目《好聲好戲》打響頭炮，當中最令人驚喜嘅就不得不提馮盈盈，佢聲演《宮心計》小演員向娘親辭別一幕，獲汪明荃及劉江等大讚，終於一雪前恥，更被網友睇好佢有機會勝出！

片中見佢講對白同唱歌都兼顧到，播出後佢仲決定自揭「醜態」，晒出兩段佢當時身在配音室嘅花絮片，見佢喊到眼淚一滴滴，雖然表情扭曲晒，但睇得出佢嘅投入同真誠，直頭好似將成場戲演咗一次出嚟咁，到片尾更加聽到現場工作人員都發出連連讚嘆嘅嘩嘩聲，睇嚟佢勝算真係幾高。

成功搣甩懶音嘅馮盈盈感觸良多，亦非常努力同投入比賽，更留下千字文感激觀眾嘅支持：「很感激大家有留意我的演出，並願意給我最中肯的意見，我是有聽到，並放在心內，持續為此努力改進。今次有幸參加《好聲好戲》，我沒有視此節目為一個比賽，而是一個為觀眾呈現高水平聲音表演的舞台，一個讓觀眾了解聲演藝術的導航、向配音專業的認可和致敬、尋求進步、突破自己的契機。如果你有因我今晚的表現而感動過一刻，那我在這小房間內、在鏡頭背後付出的一切就已經值得，衷心多謝你收看！」