專家建議搵姜濤做疫苗代言人　經理人花姐咁答

歌手姜濤早前22歲生日，粉絲鋪天蓋地為偶像慶生，喺銅鑼灣周圍都見到粉絲畀錢買嘅偶像慶生廣告，淨係睇呢啲就知佢人氣有幾勁！估唔到佢呢個聲勢，原來已經突破娛樂圈殺入其他範疇，今日就有專家建議，可以考慮邀請年輕兼人氣高嘅藝人，如姜濤作為接種新冠疫苗嘅代言人，借住明星效應提高接種率。其實呢條橋唔少地方都有用過，好似上海就曾邀請咗偶像團體「SNH48」擔任公益宣傳大使。

究竟姜濤會唔會做疫苗代言人，就呢件事問過ViuTV方面，佢哋回覆：「沒有回應，謝謝查詢！」而經理人花姐就話姜濤忙緊MIRROR嘅演唱會，冇留意新聞，亦冇相關人士接洽關於疫苗嘅工作，花姐仲話同姜濤有傾過接種疫苗問題，講到姜濤父母年紀都唔細加上身體唔算太好，而且姜濤要成日接觸好多人，都有擔心感染風險會增加，不過最後打唔打疫苗，都要睇更多關於疫苗嘅數據先會落實。