吳業坤同193合作唔驚照肺:公司好大方

2021年05月04日 23:11
東網電視
更多新聞短片
歌手吳業坤到電視城錄影《勁歌金曲》,今次是他去完日本Working Holiday後首次見人,他謂相隔半年再踏足公司:「隔離完之後第2、3日都有返嚟畀公司高層『照肺』,見咗樂小姐(樂易玲)同何生(何麗全),報告發生咩事,佢哋知我有行東海道,話遲啲畀2集節目我介紹地方。(咁錫你?)係囉,成日以為走咗之後冇人記得,但好彩返到嚟,大家仲記得我。」問到回港可有不慣?他坦言:「都有少少,生活節奏唔同,我嗰陣做廢青,但返到嚟揸車又塞車,同埋聽到啲粗口,就Feel到香港嘅節奏,嗰邊啲人唔會周街講粗口。(可能你唔知人哋講咗?)唔會,我好敏感,淨係聽粗口。」
問到在當地可有成功溝到日本妹?他表示:「識到啲朋友。(男定女?)都有,希望通番關之後可以見面。」問到可有合適對象?他抵死表示:「大家都有發展可能性。(男都得?)我都好開明,講唔埋,未必局限香港,我喺香港個朵……大家覺得我多朋友,哈哈,大家都好熟悉我,淨係做到朋友,所以要由零開始就要第二啲地方嘅人先得。」他又謂身為歌手與大家有距離感:「所以喺日本我冇介紹自己係歌手,話我係KOL,佢哋有啲都信,如果講做歌手好快就有隔膜,咁會真心啲。(但你開始都呃人?)係未講晒,未露晒底牌出嚟,哈哈。」
另外,講到他在社交平台上載與ViuTV男團ERROR成員193(郭嘉駿)的合照,問到可怕被公司照肺?他表示:「唔驚,公司好大方,都冇問我,我2年前都邀請咗MIRROR做演唱會嘉賓,樂小姐都有嚟,唔覺得會有矛盾出現,同埋其實我哋今次係傾喺網上平台合唱。(驚唔驚公司唔鍾意你合作?如果反對你會唔會暫停?)如果適當理由,例如廣告商品牌撞咗,合約上有問題就唔做,但呢啲只係普通網上合作,我都同好多歌手合作,所以冇考慮其他太多因素。」