被老公狂數！江伊晴整魚蛋飯懲罰反投訴

藝人江伊晴（Elanne）和前歌手老公Oscar（蕭唯展）結婚逾2年仍然恩愛，不過Oscar經常在網上公開笑太太「低B」，如幾日前問太太為何拎了鴛鴦襪給他着，Elanne的答案是：「着咗鞋都睇唔到！」之後又發覺開封後的貓糧，太太用保鮮夾「求其」夾住一小角就算數，而最近太太為他炮製愛心餐，不過是白飯加一粒魚蛋，相當「好餸」。

對於老公種種「投訴」，Elanne接受訪問撒嬌指Oscar乞人憎，經常在網上「數」她，所以必須作出「懲治」：「我咪煮魚蛋飯佢食，佢再講咁多嘢講，連半粒魚蛋都冇得佢食呀。」又指老公「有口話人，冇口話自己」，反投訴他說：「有次我出去做嘢，叫佢照顧好啲貓，點知我返到屋企，發現貓嗰兜水變咗『屎水』，原來啲貓糧冇清乾淨，又是但加咗水落去，成兜咪變咗啡色，好核突囉。」